قازاقستاننىڭ ۇلى جەڭىسكە قوسقان ۇلەسىن باياندايتىن پويىز

7 مامىردا ماسكەۋدىڭ «سوكول» ەلەكترودەپوسىندا «نارودنىي وپولچەنەتس» دەپ اتالعان قازاقستاننىڭ ۇلى جەڭىسكە قوسقان ۇلەسى تۋرالى 12 پوستەردەن قۇرىلعان ەكسپوزيتسيا ورناتىلعان ارنايى پويىز جۇرە باستادى.   كوشپەلى ەكسپوزيتسيا قازاقستاندا قۇرىلىپ, ودان كەيىن ماسكەۋدى, سەۆاستوپولدى, لەنينگرادتى قورعاۋدا, ۋكراينانى ازات ەتۋگە قاتىسقان ديۆيزيالاردىڭ اسكەري جولى تۋرالى, باسىپ الىنعان اۋماقتاردا پارتيزاندار قاتارىنداعى قازاقستاندىقتاردىڭ ەرلىك ىستەرى تۋرالى, سونداي-اق, ەلىمىزگە كوشىرىلگەن اسكەري-ونەركاسىپتىك كاسىپورىندارىنىڭ مايداندى جابدىقتاۋعا قوسقان ۇلەسى تۋرالى باياندايدى. قازاقتىڭ ۇلى اقىندارى الدىڭعى قاتاردا بولعان جاۋىنگەرلەرگە, بلوكاداعا تۇسكەن لەنينگراد قالاسى تۇرعىندارىنا ارنالعان اتالى سوزدەرىن جولداپ, شىعارمالارىن ولارعا ورىنداۋ ارقىلى رۋحاني قولداۋ كورسەتكەنى ەرەكشە تەرەڭ سەزىنەتىن تاقىرىپقا اينالدى. ماسەلەن, ۇلى جامبىل جاباەۆتىڭ «لەنينگرادتسى, دەتي موي!» دەگەن جولداۋ سوزدەرى بارىنە دە بەلگىلى. باسقا سۋرەتتەردە قازاقتىڭ كەڭ-بايتاق دالاسىنا كوشىرىلگەن حالىقتاردى قازاقتار جىلى قابىلداعانى بەينەلەنگەن, ال جەتىم قالعانداردى اسىراپ الۋ كەزىندە جاساعان پوستەرلەر مەن دەرەكتى فيلم­دەر ەشكىمدى ەنجار قالدىرمايدى. موبيلدىك قۇرىلعىنىڭ يەلەرى «نا­رو­دنىي وپولچەنەتس» پويىزىنداعى سۋرەتتەردە بەينەلەنگەن QR-كود  ارقىلى ەكس­پوزيتسيانىڭ كەڭەيتىلگەن نۇسقاسىمەن تانىسا الادى. تولىعىراق ايتقاندا, كەز كەلگەن مەترو جولاۋشىسى ەلشىلىك جانە «قازاقستان» تەلەراديوكورپوراتسياسى بىرلەسىپ ازىرلەگەن ۇلى وتان سوعىسى تاقىرىبىنا ارنايى بەينەروليكتەردى وزدەرىنە ەركىن كوشىرە الادى. جەڭىس پويىزىنىڭ ەكسپوزيتسياسىن قالىپتاستىرۋعا رەسەي اسكەري-تاريحي قوعامداستىعى, «ۆەچەرنيايا موسكۆا» گازەتى رەداكتسياسى, ماسكەۋدى قورعاۋ مەملەكەتتىك مۇراجايى, 1941-1945 جىلدار كەزەڭىندە ۇلى وتان سوعىسىنىڭ ورتالىق مۇراجايى دا قاتىستى. پويىزداعى كورمە الداعى جارتى جىل بويى جۇمىس ىستەيتىن بولادى. پويىز ەكسپوزيتسياسىن اشۋ راسىمىنە رەسەيدەگى قازاقستان ەلشىلىگىنىڭ كەڭەسشى-ۋاكىلى ۆيكتور تەمىرباەۆ, ماسكەۋ مەتروپوليتەنى باسشىسىنىڭ ورىنباسارى ۆلاديمير پوگودين جانە جەرگىلىكتى ارداگەرلىك قوعامداستىقتاردىڭ وكىلدەرى قاتىستى, دەپ حابارلادى رەسەيدەگى قازاقستان ەلشىلىگىنىڭ ءباسپاسوز قىزمەتى.